دعاء فاروق تعرب عن غضبها من الظلم التي يقع على السيدات
عبرت الإعلامية دعاء فاروق ، عن غضبها من الظلم الذي يلحق بالنساء من قبل أزواجهن عبر رسالة كتبتها عبر حسابها الرسمي على موقع التواصل الاجتماعي فيسبوك ، عن مأساة امرأة مع زوجها وأعلنت ملاحقته ومقاضاته
تروي دعاء فاروق مأساة زوجه :
وكتبت دعاء فاروق عبر حسابها الرسمي على موقع التواصل الاجتماعي فيسبوك :
" لحد امتى الستات هتفضل تتهان وتتذل وتتمرمط ومحدش يقدر يجيبلها حقها ... رباب ست محترمة من الستات اللى بتشتغل عندى بقالها 13 سنه واكتر .. ربت لى عيالى وصانت اكل عيشها معايا وحافظت عليا وعلى بيتى بمنتهى الامانة والاخلاص .. وانا اشهدلها بالنضافه والامانة والادب والاخلاص والاخلاق ، وست شقيانة طول عمرها عشان تربى بنتها وأبنها احسن تربيه ومتجوزه بلطجى شمام بيضرب مخدرات بفلوس شقاها وشغلها عندى "
دعاء فاروق تتوعد للزوج وتقاضية :
وتابعت دعاء فاروق قصتها متوعده للزوج بالمقاضاه ، فقالت :
“ انا هنزل اعمل فيه بلاغ حالا لانه بيهددها بأنه يرمى فى وشها مايه نار الضلالى اللى سرق عفشها كله ونقله على بيت امه ، وسرق جهاز بنتها العروسه اللى غصب عنى مضطره اقول ان انا اللي بجهزها من عندى من المعارض .. سرق كل ده وطردهم من شقتهم اللى انا اسفة اني مضطره اقول انى بدفع لها إيجارها وتأمينها وبيهدد الست صاحبه البيت انه عاوز التأمين والا هيفك موتور المايه وهياخده بلطجه كدة ”.
وأضافت :
“ الست بتجيلى يوماتى جسمها ازرق من كتر الضرب اللى فى جسمها وبيكتم بقها وبيعذبها حرفيا ، وبياخد فلوسها يشرب بيها ويضربها ، ياما قلتلها اطلقى وامشى اطلقى وسيبيله كل حاجه وامشي تقوللى اخاف ياخد منى عيالى ، دلوقتى رباب في غيبوبه سكر وعيالها كلمونى بيستنجدوا بيا ومنهارين على امهم الشقيانة ومش طايقين ابوهم اللى راح يسحب ورق الولد من المدرسه مش عاوزه يتعلم وبيهددهم انه هيحرق قلبهم علي امهم .. طيب يا راجل يا ضلالى ياللى سرقت عفش وجهاز بنتك اللى مراتك جايباه من شقاها انا هعمل بلاغ رسمى للجهات الرسميه فيك وهنزل حالا اجيب حق رباب بالقانون قبل ما تتقتل فطيس "
دعاء فاروق : هعمل محضر عدم تعرض :
واختتمت حديثها قائلة :
" انا هلحق الجريمه قبل ما تحصل وبالمره هروح اعمل محضر عدم تعرض لانه اكتر من مرة يهددها انه هيضايقنى .. طيب يا بلطجى عصرك وأوانك انا ببعت استغاثه للجهات الامنية عشان انقذ الست الغلبانه وعيالك الغلابه منك اللى بيكلمونى مفطورين من العياط من بطشك وظلمك وقلة أدبك " .
